Oggulítil

Hellist yfir hugarbálið
er húmið sækir að.
í þig verð að stappa stálið
stattu bein og mundu það
að eftir skúr mun skína sólin
skært og hlýtt á heima hólinn.

Ábyrgð

Við sem sitjum í kotinu kalda
á Alþingi höfum útvalda
þingmenn marga
sem hátt nú arga
af ábyrgð þeir telja sig kvalda

Til Hófs

Fákar sýna viljan vakra
verður gjarnan til ein staka
Kveð í bili en kem til baka
til kosta mun þá Hóf minn taka

Til einnrar fótkaldrar

Kuldi er ei konum hollur
kúri þær í húminu
Fer um karla kaldur hrollur
ef krókna tær í rúminu

Flygill

Flygill minn hefur átt við krankleika að stríða í haust. Kom í hús með holdhnjóska á baki þannig að hann hefur verið á sjúkrabeði í mánuð og stjanað við hann. Fór ekki að taka framförum fyrr en ég klæddi hann í kjól á nóttunni. Fékk loks að fara á bak þann 23. janúar sl.

Fór í túr á Flygli mínum,
flugum yfir á draumaströnd
Færi sögu í fáum línum
á ferð mér héldu engin bönd.
Hátt við svifum um himingeiminn
hurfum bak við sjónarrönd.
Minnist glaður dagsins dreyminn
dulin birtust fáksins lönd.

Sendi þetta á mjög svo þögulann vin minn um þessar mundir

Dauður ekki alveg enn,
er hér von á bögu?
Skrifar annál skemmtir senn
skráir Halur sögu!

Á vinnustað mínum voru starfsmenn áminntir um að vanda vinnubrögð við þyngdar og hæðarmælingar.

Margur vill við góminn sinn gæla
guðdómleg finnst þeim sú sæla
en syrtir í álinn
ef röng verða málin
rétt bmi brýnt er að mæla

(bmi=þyngdarstuðull)

Afmæliskvæði

Rúnar sáli sæll í anda,
siglir niður tímans fljót.
Árin fertug fjörug blanda,
færðu gleði kappa í mót.

Í vöðlum öslar veiðir fiska
vígamóður grípur bráð.
Fugla eltir útí buska,
oft þar drýgir hetjudáð.

Verkir marga vilja buga
vinna þín er mikið streð.
Sálir fangar sefar huga
svona bæta má nú geð.

Knattleik æfir kappinn eini,
kætist fyrir utan völl.
Bullur ei því lengur leyni
látum hljóma okkar köll.

Hrópum ferfallt húrra; - Rúnar!
hefjum okkar raust í lundi.
Bésex stúlkur býsna lúnar,
bíða eftir næsta fundi.

Sumarkoma

Sumargleði sól og ylur
syngur lóa útí mó.
Burtu kveðinn kaldur bylur
kemur vor í okkar skóg.
Hlýnar loftið grænkar grundin
gleði berst um Reykjalundinn.
gaman er að vera til.


(ort fyrir hið virta útgáfufélag Reyk og ritstjóra þess í tilefni sumars).

Staka

Í fúlan pitt ég féll um stund,
og fann þar gífuryrði.
Nú er frekar létt mín lund,
þó lítils sé þess virði.

Janúarstökur

Myrkurhugi mig oft plagar
og meiðir góða vini.
Gleði veitir og ljós þitt lagar,
lund í mánaskini.

Veistu hve sárt ég sakna þín,
sakbitinn á hjarta.
Þó innst við beinið sé ég svín,
sé ég ljós þitt bjarta

Mistök geri mörg í senn,
margt um hugann flýgur.
Heitast trúi og held þó enn,
að hjarta ekki lýgur.

Stórmenni

Nú sögur fljúga sem fiður
fæstar sannar því miður
að ég hafi lést
sem best af því sést
að enn kemst í buxurnar kviður
og hve lítill ég vaxinn er niður.

Ekki týna húmörnum.

Hnokki

Með eindæmum er flókið að flokka
það að farið er langt út að skokka
viðra svo hund
fara á einn fund
og finna skó á einn hnokka.

Lausgirt

Úr Kópavogi kona ein giftist
við kokkálaðan manninn hún firtist
brátt eftir brúðkaup
tók hún fljótt tilhlaup
og lörfunum síðan lausgirtist.

Í tilefni nýrra deildar í efra

Sent kollega LG í morgun og þá var out-of-office svar, svo ekki kveður hann mikið næstu daga.

Í Oddshúsi vakna nú væringjar
er veitast að spiki með særingar
og fitunni brenna
svo búkarnir renna
í teymi offitu og næringar

Klækir

GP vinkona mín norðan heiða sá mann skima laumulega til allra átta á miðju Kaupangsstræti og síðan....

Datt þetta í hug af því tilefni:

Að Kaupangi ég kom um stund
og karl einn sá með klæki.
Það minnti mig helst á hund
höndla eigin tæki.

Bragfræðibull

Sá eitthvað sem kveikti í mér svo til varð þessi vísa. Býst við að það hafi verið bragfræðibull.


Fátt í tómum heila hrærist
er heimskur reynir að yrkja.
Vonandi þó að ljóðið lærist,
þeim er lægri endan virkja.

Staka fyrir stelpur

Í köldum gusti kúra inni
með kafalds hríð á skjánum
Heitan blástur held þær finni
hér í grænum trjánum

Sumri fagnað

Þrjú ljóð úr ræktinni.

Laugar
Stones planet stendur
skrifað á bol þeldökku
stúlkunar sem knýr áfram
life cycle vélina


Eftirskrift
með afli þú grefur
því ekki viltu
upplifa sársauka
og gleði

aðeins gleyma

Gleðilegt sumar ......

PS þriðja ljóðið var svo væmið að Ærir ákvað að birta það ekki og lætur hverjum og einum eftir að yrkja sitt sumarkvæði.

Skrýtnir skór

Fór í bæinn í gær og fór í klippingu og er nú kominnn með vel snyrt 4mm skegg. Fékk nudd í hársvörðin og rann ýmislegt upp fyrir mér. Það er gott að hugsa í rakarstól, og segja bara jam og já þegar rakarinn malar, en maður er annars hugar. En sumt verður víst ekki aftur tekið, fremur hárið sem féll á gólfið. Það verður maður að sætta sig við, en hárið vex þó alltaf aftur (og skeggið líka).

Fór svo að leita að bókinni ágætu um fæði páfanna en hún fannst hvergi. Ég fékk þó tækifæri til að prófa skóna mína nýju í brekku. Gekk upp og niður Bankastrætið og Laugaveginn og Austurstræti. Var svo léttur á mér að ég nánast spólaði og datt í hug þessi bullvísa:

Mikið á ég skrýtna skó
með skemmtilega sóla
Unga stúlkan æpt´og hló
er hún sá mig spóla

Rakst á bók sem heitir 1,000 Places to See Before You Die. Keypti hana "med det samme". Hét því að leggjast í ferðalög til framandi staða.